తిరుమలాయపాలెం మండలంలో విత్తన దుకాణాల ఆకస్మిక తనిఖీలు..
నకిలీ విత్తనాలు విక్రయిస్తే ఉపేక్షించేది లేదు !
⇒ ఏవో నా రెడ్డి సీతారామరెడ్డి
⇒ ఎస్ఐ కూచిపూడి జగదీష్
ఖమ్మం/తిరుమలాయపాలెం, జూన్ 20(ఖమ్మం వాణి)
వానాకాలం సాగు ప్రారంభమైన నేపథ్యంలో రైతులకు నాణ్యమైన విత్తనాలు అందేలా చూడాలనే లక్ష్యంతో ఖమ్మం జిల్లా తిరుమలాయపాలెం మండలంలోని పిండిప్రోలు గ్రామంలో వ్యవసాయ, పోలీసు శాఖల అధికారులు బుధవారం సంయుక్తంగా ఆకస్మిక తనిఖీలు నిర్వహించారు.తనిఖీలు నిర్వహించిన వారిలో మండల వ్యవసాయ అధికారి నారెడ్డి సీతారామరెడ్డి, తిరుమలాయపాలెం ఉప-పరిశీలకులు కూచిపూడి జగదీష్ ఉన్నారు. వీరి ఆధ్వర్యంలో జరిగిన ఈ తనిఖీల్లో గ్రామంలోని పలు విత్తన దుకాణాలను సందర్శించి రికార్డులను క్షుణ్ణంగా పరిశీలించారు.విత్తన డీలర్ల వద్ద ఉన్న నిల్వ పట్టికలు, అమ్మకాల రశీదు పుస్తకాలు, ‘ఓ’ నమూనా పత్రాలు, విత్తన స్వచ్ఛత పరీక్ష నివేదికలు, కంపెనీల అనుమతి పత్రాలు, డీలర్ల అనుమతి పత్రాలు తదితరాలను అధికారులు తనిఖీ చేశారు. దుకాణాల్లో నిల్వ ఉన్న విత్తనాల రకాలు, వాటి గడువు తేదీలు, ధరల పట్టికలను సైతం పరిశీలించి నిబంధనల మేరకు వ్యాపారం జరుగుతుందా లేదా అని ఆరా తీశారు.ఈ సందర్భంగా వ్యవసాయ అధికారి నారెడ్డి సీతారామరెడ్డి మాట్లాడుతూ, రైతుల శ్రేయస్సును దృష్టిలో ఉంచుకొని ప్రభుత్వం ఈ తనిఖీలు చేపట్టిందన్నారు. కొందరు స్వార్థపరులు లాభాపేక్షతో నకిలీ, నాసిరకం విత్తనాలను విక్రయించి రైతులను నష్టపరుస్తున్నారని, అటువంటి వారిపై కఠిన చర్యలు తీసుకుంటామని హెచ్చరించారు. ప్రతి డీలర్ తప్పనిసరిగా రశీదు ఇవ్వాలని, అనుమతి పొందిన కంపెనీల విత్తనాలను మాత్రమే విక్రయించాలని సూచించారు.కూచిపూడి జగదీష్ మాట్లాడుతూ, నకిలీ విత్తనాల విక్రయం చట్టరీత్యా నేరమని, అలాంటి వారిపై కేసులు నమోదు చేసి చట్టపరమైన చర్యలు తీసుకుంటామని తెలిపారు. రైతులు ఎవరైనా నకిలీ విత్తనాల వల్ల మోసపోతే వెంటనే వ్యవసాయ శాఖ లేదా పోలీసు శాఖకు ఫిర్యాదు చేయాలని కోరారు. రైతులకు అన్నివేళలా అండగా ఉంటామని భరోసా ఇచ్చారు.
About the Author
