రైతులకు శుభవార్త: ఉచితంగా పంట కుంటలు..

రూ.96,000 సాయం, జూలై 7 లోపు దరఖాస్తు చేసుకోండి.

వర్షపు నీటిని ఒడిసిపట్టి సాగును స్థిరీకరించే అవకాశం.. చేపల పెంపకంతో అదనపు ఆదాయం

ఖమ్మం|ఖమ్మం వాణి, జూలై 03: రైతన్నలకు రాష్ట్ర ప్రభుత్వం శుభవార్త చెప్పింది. వర్షపు నీటిని నిల్వ చేసుకుని, సాగుకు భరోసా కల్పించేందుకు ఉచితంగా పంట కుంటలను ఏర్పాటు చేసేందుకు ముందుకు వచ్చింది. ఉపాధి హామీ పథకం ద్వారా ఈ పథకాన్ని అమలు చేస్తున్నారు. వర్షాధార వ్యవసాయంపై ఆధారపడిన చిన్న, సన్నకారు రైతులకు నీటి సమస్యను తీర్చడమే ఈ పథకం ప్రధాన లక్ష్యం. పంట కుంటల ద్వారా వర్షపు నీటిని నిల్వ చేసి, కీలక దశలో పంటలను కాపాడుకోవచ్చు. అంతేకాకుండా భూగర్భ జలాలు పెరిగే అవకాశం ఉంది. ప్రభుత్వ నిబంధనల ప్రకారం ఒక్కో పంట కుంట నిర్మాణానికి గరిష్టంగా రూ.96,000 వరకు ఆర్థిక సాయం అందిస్తారు. పూర్తి ఖర్చును ప్రభుత్వమే భరిస్తుంది. రైతులు ఒక్క రూపాయి కూడా ఖర్చు చేయాల్సిన అవసరం లేదు.

• అర్హతలు: రైతుకు 5 ఎకరాల లోపు వ్యవసాయ భూమి ఉండాలి. ఉపాధి హామీ MGNREGS జాబ్ కార్డు తప్పనిసరిగా కలిగి ఉండాలి.

• పంట కుంటల వల్ల 5 ప్రధాన ప్రయోజనాలు:

1. నీటి నిల్వ: వర్షపు నీటిని ఒడిసిపట్టి, పంటలకు అవసరమైనప్పుడు వాడుకోవచ్చు.

2. పంటల రక్షణ: వర్షాభావ పరిస్థితుల్లో పంటలు ఎండిపోకుండా కాపాడుకోవచ్చు.

3. చేపల పెంపకం: కుంటలో చేపలు పెంచడం ద్వారా అదనపు ఆదాయం పొందవచ్చు.

4. పశువుల మేత: అజోలా వంటి పశుగ్రాసాన్ని పెంచుకునేందుకు ఉపయోగపడుతుంది.

5. ఆదాయం పెంపు: బహుళ ప్రయోజనాలతో రైతు ఆదాయం గణనీయంగా పెరుగుతుంది. అర్హులైన రైతులు జూలై 7, 2026 లోపు తమ గ్రామ వ్యవసాయ విస్తరణ అధికారి (AEO) లేదా ఫీల్డ్ అసిస్టెంట్ (FA)ను సంప్రదించి దరఖాస్తు చేసుకోవాలి.

కావాల్సిన పత్రాలు: పట్టాదారు పాస్‌బుక్ జిరాక్స్, ఆధార్ కార్డ్, MGNREGS జాబ్ కార్డు. గడువు సమీపిస్తున్నందున రైతులు వెంటనే సంబంధిత అధికారులను కలిసి దరఖాస్తు చేసుకోవాలని అధికారులు సూచిస్తున్నారు. ఈ అవకాశాన్ని సద్వినియోగం చేసుకుని వ్యవసాయాన్ని లాభసాటిగా మార్చుకోవాలని కోరుతున్నారు.

మరిన్ని వార్తల కోసం…