వేతన సవరణ, ఆరోగ్య కార్డు నిబంధనలు వెంటనే అమలు చేయాలి: ఉపాధ్యాయ సమాఖ్య డిమాండ్
తిరుమలాయపాలెం, జూలై 07(ఖమ్మం వాణి): రాష్ట్ర ప్రభుత్వ ఉద్యోగులు, ఉపాధ్యాయులు, పెన్షనర్లు ఎంతోకాలంగా ఎదురుచూస్తున్న రెండో వేతన సవరణ సంఘం నివేదికను వెంటనే తెప్పించి అమలు చేయాలని తెలంగాణ రాష్ట్ర ఉపాధ్యాయ సమాఖ్య రాష్ట్ర కార్యదర్శి పారుపల్లి నాగేశ్వరరావు ప్రభుత్వాన్ని కోరారు. మండల కేంద్రంలో ఆదివారం నిర్వహించిన సంఘ సభ్యత్వ నమోదు కార్యక్రమంలో ఆయన పాల్గొని మాట్లాడారు. రెండు వేల ఇరవై మూడు జూలై నుంచి అమలు చేయాల్సిన కొత్త వేతన సవరణ సంఘం అమలుకు ముప్పై ఆరు నెలలు పూర్తయిందని తెలిపారు. ఇక ఆలస్యం చేయకుండా నివేదికను తెప్పించుకుని ఉద్యోగ, ఉపాధ్యాయ, పెన్షనర్ సంఘాలతో చర్చలు జరిపి వెంటనే అమలు చేయాలని డిమాండ్ చేశారు. ఉద్యోగులు, ఉపాధ్యాయులు, పెన్షనర్ల కోసం ప్రభుత్వం ప్రకటించిన ఆరోగ్య కార్డు పథకం నిబంధనలను కూడా తక్షణమే రూపొందించి అమలులోకి తేవాలని అన్నారు. ఉద్యోగులకు, పదవీ విరమణ చేసిన ఉద్యోగులకు పెండింగ్ లో ఉన్న అన్ని బిల్లులను వెంటనే చెల్లించాలని కోరారు. కొత్త పెన్షన్ విధానంలో ఉన్న ఉపాధ్యాయులకు పెండింగ్ లో ఉన్న కరువు భత్యం బకాయిలు, ఆరు వాయిదాల కరువు భత్యాన్ని విడుదల చేయాలని డిమాండ్ చేశారు. ఉపాధ్యాయుల సర్వీసు నిబంధనలను రూపొందించి, పర్యవేక్షణ అధికారులకు పదోన్నతులు కల్పించాలని కోరారు. కొత్త పెన్షన్ విధానాన్ని రద్దు చేసి పాత పెన్షన్ విధానాన్ని పునరుద్ధరించాలని, రెండు వేల మూడో డి.ఎస్.సి ద్వారా నియామకం పొందిన ఉపాధ్యాయులకు కూడా పాత పెన్షన్ వర్తింపజేయాలని అన్నారు. కస్తూర్బా పాఠశాలలు, సమగ్ర శిక్షా ఉద్యోగులకు ప్రాథమిక వేతనం ఇవ్వాలని, సమ్మె కాలపు జీతం మంజూరు చేయాలని కోరారు. విద్యాహక్కు చట్టాన్ని సవరించి సర్వీసులో ఉన్న ఉపాధ్యాయులకు ఉపాధ్యాయ అర్హత పరీక్ష నుంచి మినహాయింపు ఇవ్వాలని, వారు బోధిస్తున్న సబ్జెక్టులలోనే పరీక్ష నిర్వహించాలని, సర్వీసు వెయిటేజ్ ఇవ్వాలని విజ్ఞప్తి చేశారు. ఈ కార్యక్రమంలో జిల్లా, మండల స్థాయి నాయకులు సుధాకర్, కేశవ, రవిబాబు, శంకర్ రావు, శ్రీనివాసరావు, ఆనంద్ తదితరులు పాల్గొన్నారు.
About the Author
